Анқара,  3  апрел  (АМИТ «Ховар»,  Катерина  Аксакова). - Имрӯз, 3  апрел   дар  Осорхонаи  суратҳо  ва пайкараҳои  шаҳри  Анқара  ба  муносибати  таҷлили  иди  Наврӯз  намоишгоҳи  асарҳои  рассомони  Тоҷикистон  кушода  мешавад.  Ташкилкунандагони намоишгоҳ  Сафоратхонаи  Ҷумҳурии  Тоҷикистон  дар  Туркия,  Иттифоқи  рассомони  Тоҷикистон  ва Вазорати  фарҳанг  ва туризми Ҷумҳурии  Туркия  мебошанд.

Дар  Сафоратхонаи   Тоҷикистон  дар  Туркия  ба  АМИТ «Ховар»  хабар  доданд, ки   намоишгоҳ  ба  муносибати   иди  байналхалқӣ  эълон  шудани  Наврӯз  ташкил  карда  мешавад.

Дар  маросими  ифтитоҳи  намоишгоҳ  ҳайати  Тоҷикистон  таҳти роҳбарии  раиси  Иттифоқи  рассомони  мамлакат   Сӯҳроб  Қурбонов  иштирок  менамояд. Ба  ҳайат  инчунин  директори Бунёди байналмилалии  косибони Тоҷикистон – «Ҳафт  пайкар» Мукаррама  Қаюмова  шомил  мебошад.